ابو ذيات لعيونكم

ابو ذيات لعيونكم

حبيبي ماشفت مثلك ولا اشوف
ولجلك راحت اعيوني ولا شوف
اليضدك لا عقل عنده ولا شوف
لأن انته النظر والروح اليه

اريد اكصد لعد كلبك وضيفه
واحط حبي على حبك واضيفه
واذا هذا العشك صاير وضيفه
ماأطلع تقاعد للمنية

الك بايع دليلي وانته حر بيه
انجن انه بجمالك وانتحر بيه
اليحبك غيري صدك انتحر بيه
لأن حبك امخصص بس اليه

انه الشديت جرحك ليش حليت
وعليه حلت الطلاب حليت
ذكرتك بأمتحاني وغلط حليت
شجاوب وانته شاغل حته اديه

قلم قلبي تداين ورقه منك
ابد ماكو بجمالك وارقى منك
الأول راح اسجلك وارقمنك
واكتب لافته مجوز اليه

سهول الناس عندي وانته راسي
وسفن غركت ابحري وانته راسي
حبيبي انته وعزيزي وتاج راسي
واعز منك ترى ماكو عليه

انا العطشان منك ماي أتاني
ومثل صبري بغيابك من يتاني
دكلي اشلون صحتك ميت اني
بسبب فركاك يلمبعد عليه

عليك الكلب فك عينه وذانه
واشتياقك حيل عذبنه وأذانه
اذا باسك بشر تسكت وأذا انه
منبوسك تكلب الدنية عليه

محبتكم علينه هواي نعمه
وبعدكم مانشوف الدرب نعمه
اكو أغنيه بشريط حسين نعمه
كافي من البعد مرو عليه

يجدمي دلحك بربعك ولك حيل
بدت ماجن إلك قوه وألك حيل
انه الجنت المعدل والكحيل
بحوافر خيلهم داسو عليه

أرجو أن تكون الأبيات الشعرية قد نالت إعجابكم شكراً لمروركم وسامحوني على المواضيع البسيطة.......... أخوكم (......... قاسم ...........) @@@ . . . تحياتي. . . @@@